Bu Khuz̃hg Pũzũve Limaner Ce K̃hẽnetk

Cẽ Fazal Amin Beg en

Bu khuz̃hg pũzũve limaner ce k̃hẽnetk
Ishqi spo obruy,, gar sak yem dishetk

Cereng go’n sak ye z̃hũ khuz̃hgig̃h-e sitor
Ishq-e ra gardoven wudhg sak ce pẽrvetk

Din raknig̃h zũlm-e riwoj , ye z̃hũ jonon!
Skem spo khuz̃hgig̃h-e pudh az̃hdar’vev likerk

vitken majbũr ce dem k̃hũ shũm yi bu rasm
Dam’vev spo ishq-e dhast et pũdhisht vẽndetk

Tu et wuzen sargardon dem zindagig̃h
Shirin et Farhod-e ya ishqen gũtetk

S̃hkenden yem jabr-e z̃inz̃ir , nũzen tra vich
Dem spo ishq sakev da bindigig̃h kẽt̃etk

Fazal Amin! G̃hatep manz̃il, c̃how dem safar
Ishq-e ra samandar ki sa’shtev rũnd̃iyetk