Cẽ Fazal Amin Beg en
Yana z̃hũ gũl banafsha, skem ti bargem wuz parwoana
Dem ti vul vitkem nasha, skem ti rangam wuz diwona
Dem ti yod et andisha, thũwmes̃h k̃hũ yinũk shabona
Ti nungen wuz hamisha, kat̃mes̃h tasbih dem bũtkhona
S̃henjmes̃h wuz gũl banafsha, gũl banafsha, gũl banafsha
Cẽ haq’net gũl banafsha, misl-e sitoret ska falalk
Rem z̃hũ pũzũv ti shilha, voynes̃h ce cart misl-e z̃hũmak
Dem ti voyn et dem ti soz, j̃akhmes̃h ya wakhs̃hev skem k̃hũ tor
Randes̃h mar yem ti owoz, k̃handes̃h mar ti rang et rukhsor
Ye zhũ spreg̃hi banafsha, wezis̃h dem z̃hu c̃hez̃m-e mala
Dem z̃hũ pũzũv-e shisha, hal k̃he nemjes̃h ce mastona
Vitket z̃hũ jush et z̃hũ roz, vules̃h ce car’m tow nag̃hd et ror
Yan cerng ne carm sẽk tow noz, g̃hatũves̃h maz̃h ce ska sitor
Ya z̃hũ spreg̃h dem z̃hũ dhast, niyengi dem z̃hũ fik-e s̃hig̃hun
Cerengep wuz ne wocem mast, vitki ce z̃hũ ishq-e nis̃hun
Gũl banafshaher niyoz, ceyi k̃hetk maz̃he biqaror
Cumer dam yodem daroz, ceyem ghal dan-e intizor
Lewbũtbũt gezde bikhlew, ce wezde ya da tobiston
Ne tu hechkuy kum palew, tuwem ska hagh wuz da tobon
Gũl banafsha tu da goz, ceyi wũzmetu mar bahor
Sarsavz haska poyindoz, g̃hatin ce sak ska kuh-e tor
Fazal Amin kat̃ k̃hũ vedek, teyi ghal ghafch chiz dem pinhon
Ki dez̃hget ish-e kez̃hek, go yem k̃hũu toj tu dem meydon
Tiyor woc ey hawoboz, dũrzit yem k̃hũ ishq-e sor
Carit qiti sasht parwoz, kifchtan da k̃hũ shohisawor
No Comments