CẽFazal Amin Beg en
Didig̃h ko har chiz yiloy, cerenges̃h c̃hawen dem jahon
Yorig̃h mes̃h car’nes̃h ce yark, cem zamin en to da osmon
Sũdhũy’nep ghafch chiz ta’r wir,magamme me yaw fand ye dust
Wũdretkev k̃hat tẽr liman, ki me wocen hech kumd ziyon
Ko didig̃h yem spo zamin, woz yemzel har sayora
Cerenges̃ hwocen parwona, yir-e ya voyner skẽ k̃hũ jon
Haryi sayora et z̃hũmak, c̃haw’nes̃ hgar ska k̃hũ vẽdek
Magam paywandev haryũw, da k̃hũ sitor-e tobon
Yem spo yiri yi sitor, wines̃h sitorev bishũmor
Magam nastev tag yasht wir, paywandev da kahkashon
Kahkashonishtev bishũmor, ki neyes̃h dishen ghal tumer
Yashtev ajab tẽr liman, gok̃hnes̃h ko chiz da osmon
Ki ne’s̃h disht tumer inson,ghal yem k̃hũ yir-e irdgird
Chizer yan ras̃hen bũland, da stor’v-e kahkashon
Skem k̃hũ khũshruy zaminniv, wez tayinen tẽr liman
Ghafch chizisht spo s̃hik̃h misol, dish yi chand tu dem bayon
Haryi chizes̃h da k̃hũ dir, hald k̃he cartes̃h ya k̃hũ yark
Yav-e dirisht tẽr liman, wũdretkev yan yem jahon
Tayin yem yupk et hawo, woz yem spo shet et rakhnig̃h
Ki woc’nes̃h yasht tẽr liman, k̃he c̃haw’nes̃h dẽ har zamon
Cemal ki niyes̃ht har chiz, ca k̃hũ yis̃hal en tẽrvich
Wũzũmdes̃h biyoromig̃ ce, gok̃htes̃h harkuy sargardon
Insonisht tẽr limanev sar en pũd hband’v-e monand
Ki chern har band pẽ liman, ya’nes̃h wost hawli inson
Har yangleni yow-e yark, magma pẽ limani yav quwat
C̃hak dhastisht g̃harer dorũw, zur yark’ves̃h gok̃hen oson
Skẽ yi tap ne’s̃h wost tapin, hech kumd parinda ki didig̃h
Ne’s̃h tag c̃hit kuy skẽ yi pũdh, ki teyet tu yi inson
Tayin inson’v-e mulung, yoy da haywon’v-e mulung
Mard et zan ki tẽr liman, wostes̃h yav en yi khondon
Dẽ har watan et samoj, tẽr liman woc’ni riwoj
Hũfnes̃h rishta’v e har jay, rec̃h’nes̃h pũrũt dem jahon
Dẽ jeftes̃h wocen tẽr liman, har makhluq dem koyinot
Bijefti Parwardigor, ki Yowi ayon et pinhon
Dilchaspi haryi makhluq, yek̃h woc cem’v en Fazal Amin
C̃haw skem qonũn-e qudrat, dũrz donoyig̃h-e somon
No Comments