Z̃hũ Ishq-e Khazinaet Tu

Cẽ Fazal Amin Beg en

Z̃hũ ishq-e khazinaet tu, khũshruy ya gũldastaet tu

Z̃hũ khũshig̃her mũz̃hdaet tu, khuz̃hggig̃h-e ya mazaet tu

Nasti kuy tag drem ti misol, ki paydo vitk dẽ kum sol

Noyoft z̃hũ banafshaet tu, z̃hũ ishq-e khazinaet tu

Ti sokhtishtev kam da bihisht, sẽk tow khũshruyig̃hes̃h ce thit

Ya hũr bũland poyaet tu, z̃hũ ishq-e khazinaet tu

Nim k̃hũ ũmrem   rem’t da ti yod, ki car’mes̃h k̃hũ ishq-e obod

Z̃hũ ũmr-e ya baraet tu, z̃hũ ishq-e khazinaet tu

Lupi ce ma’r fikr-e jahon, werc̃h’mes̃h dẽ tow dẽ har zamon

Z̃hũ khiyol’v-e ishoraet tu, z̃hũ ishq-e khazinaet tu

Bũlandet z̃hũ ishq-e shohin, da osmon hamishet tapin

Bodũr z̃hũ parindaet tu, z̃hũ ishq-e khazinaet tu

Fazal Amin cer’ng cart stowis̃hig̃h, vitki bibas dem ti khuz̃hgig̃h

Mẽrgech Hamish tozaet tu, z̃hũ ishq-e khazinaet tu