Zik-e Jahon

Cẽ Fazal Amin Beg en

 

Wostes̃h paydo yi inson, Hamish dẽ aql-e jahon

Ziki aql-e ya somon, bizik aql en nast chiz shon

 

Ziki maghz saqofat en, saqofat k̃han yoy farhang k̃han

Dish yem maghzi khazina, randes̃h skem ya ilm et hang k̃han

 

Ziki yi farhang-e jon, tem-e tov en g̃hũrt’nes̃h ya kon

Yemet ki nost dem jahon, me yan tag k̃han tu’t inson

 

Het̃es̃h cart s̃hig̃hun-e bar, ki ziki tey yow wis̃hik

Wocep Hamish dar pẽ dar, ki nostet towe k̃hũ zik,

 

Bas ki wez c̃hak zikv’v-e dish, yemi tey ghafch lup hũnar

ilm-e samandar yem dish, c̃hak k̃hat car dem z̃hũ jigar,

 

k̃hũ zik-e qadr-e k̃hat niv dish, ceyes̃h car tu yem e ziyon

Chi’res̃h di pẽr pũdh tu yem, shakep nas̃h tu dem jahon

 

Fazal Amin! parishonem, chiz’ren vitk sak nim hakim

Bũn’nes̃h khũshruy lavz har ror, ror sar woc’nes̃h sak yatim