Category: Devotional

Cẽ Fazal Amin Beg en

Ye z̃hũ gũl-e ambarin, tuwet k̃hat ya z̃hũ shirin
Ishq-e z̃hũmoh jabin, bihisht-e ya z̃hũ zamin
Dem jahonet ce tu ma’r, cẽ kũl chiz en khuz̃hgjin

Qũrbon ta’r yem z̃hũ chut̃ jon, ye Pari-e pariston
Tu’t k̃hat z̃hũ pũzũv-e armon, z̃hũ ishq-e tov-e ya tobon
Spreg̃h-ya banafshayin, bahodũr ya z̃hũ shohin

Nẽs̃hetkem ce da ti sũrat, woz da ti mehr et muhabat
Yinot rang khũshruy odat, cereng carem ko ti sifat
Z̃hũ khuz̃hg Khũdhoyer ofarin, ki k̃hetki tow kũli hasin

Hechkuy bas cẽ to’n bishkha, z̃hũ bihisht-e khuz̃hg maywa
Tu’t z̃hũ ishq-e khazina, dem jahon z̃hũ farishta
Voynin ya z̃hũ moh-e Parvin, win ko jald k̃hũ Fazal Amin

September 15, 2023 in Gilgit

Cẽ Fazal Amin Beg en

Ya z̃hũ gũli ce nẽs̃hetk, nasti tag cam en khabar
Bis̃hũrig̃hi dam ce thetk, dẽ kum holi ko z̃hũ ambar

K̃hat’mes̃h yower tu’t z̃hũ jon, balki z̃hũ jon-e jahon
Albat ne rawo tiwetk, ya’r z̃hũ ishq-e bor et bar

Da khũsh bahor-e oghoz, z̃hũ gũle dhet ma’r yi lup dard
Kũ gẽna z̃hũ pũzũvi s̃hẽket, niyengi niv khũsh ya zũlmgar

Matlab-e dũnyo’er tuf, ya hirs-e intiho’er tuf
Insoniyat ki kuy ne dishetk, dam en ishqi g̃hirner zahr

Kũ spreg̃hisht nast yi rang, me woc nodon Fazal Amin
Noyofti ya gũl-e vul, kumdi ki misl-e ambar

September 15, 2023 in Gilgit

Cẽ fazal Amin Beg en

Azob-e dem zindagig̃h, caremes̃h shũkrat ye z̃hũ Mawlo
Dẽ har sũrat ozmoyish, maz̃het ce wũzmetk dem dũnyo

Nasti dem tag be chiz shek, hechkuy inson nasti komil
Yi ney yi rangev dẽ nuqs, magam dishnes̃h k̃hat lup dono

Yem z̃hũ zohiri newing, vitk qiyomat ma’r dem jahon
Z̃hũ zindagig̃h-e safar, vitki wayron cer’ng go’m yo Khudo

Hũmũy’n k̃hũn yoy digar, dishnes̃h k̃hater maz̃h lup ozob
Ca sharm et wũs̃hũk en, dhast’ves̃h ras̃h’v en dem z̃hũ dũnyo

Cereng go’m z̃hũ khuz̃hg Khũdhoy, neyet k̃het maz̃h tumer gũdoy
Nasti kũk̃hter tag gila, chizres̃h maz̃h ne disht z̃hũ Porso

Yo Khũdhoy! K̃hatet wũzmetk , yow-e ishq dem z̃hũ zindaig̃h
Khũshruy tu yow-e rũwes̃h, k̃hetki niv k̃hat ce bisado

Khũdhowand !Ki Tu’t Hozir, cem ishq en het̃ yow khuz̃hg-e pũzũv
Wũzũm jald yow-e jonon, go yow Fazal Amin-e hamro

Composed on September 15, 2023 in Gilgit)

Cẽ Fazal Amin Beg en

Har jayes̃h sũma’m, skem ruy-e zamin
Nẽs̃hetket ce tu z̃hũ murgh-e zarin
Coghd’rep ko gotem tow ye z̃hũ hasin
G̃haten woz sak da k̃hũ ishq-e barin

Nasti ma’r qaror, rostki yem ti fikr
Wuzem nag̃hd to ror, ajab dem ti hijr
Ya parwarigor, likerkem yow zikr
Afsũs nẽs̃hetket, z̃hũ ishq-e shohin

Kuy tower k̃hẽnetk, ti yashi khur
G̃has̃hi yaven thetk, binẽmek et s̃hur
Tu’t k̃hat ce yiwretk,baf yarkever zur
Porso-e shirin, khuz̃hg Moh-e Parvin

Tu’t khuz̃hg z̃hũ bũlbũl, z̃hũ khush ilhon
Shirin ya z̃hũ gũl, z̃hũ ishq-e jon
Dẽ tow’ni z̃hũ shũl, ye z̃hũ jonon
Me go ko tag khor, k̃hũ Fazal Amin

Composed on September 15, 2023 in Gilgit)

Cẽ Fazal Amin Beg en

G̃hat’mes̃h ce da maykhona, woz ska rukhn sharob-e kul
Wezimes̃h ce wuz dẽ nasha, ska sekr k̃hũ gũlob-e vul

Ajabi ya truq Sharob woz ya khushbuy-e z̃hũ gũlob
Ki woc’nes̃h kifch trẽ liman, gok̃h’nes̃h z̃hũ dardev ce gul

Ne’s̃h weres̃ht khalg dẽ k̃hũ hũssh, yem ishqi ajab nasha
Yig̃hun cartes̃j wakht barbod, woz zindagig̃h-e ce chul

Ki k̃handes̃h k̃hater inson, wostes̃h dẽ ishq yow s̃hũkor
Hũmũyd yow qad en bũland, da miyona yoy ya d̃ul

Rost ishqi lup ni’mat, woz Khũdhoy-e barakat
Kuyi ki tey bihis inson, ne’p wizit dem ishq-e ghul

Z̃hũ gũl’v-e ishq ma’r disoved, Khũdhoy-e ishq be dẽ maz̃h
Skamev weres̃ht z̃hũ salom, ki wudhg, caremes̃h bu lavzev drem wul

Ishq hũmũt Khũdhoy en, yoy Khũdhoy-e banda’v en
Khushbakhtet dem Fazal Amin, pũrũt hayem rang tu cul

Composed on September 15, 2023 in Gilgit

Cẽ Fazal Amin Beg en

Gezd’im cum loy ki rũms̃hem, dem jahon k̃hũ jon-e hamro
Nev vite tag yem ma’r mũmkin, ki bũnem k̃hũ gũl-e ra’no

Dẽ z̃hũ har tek̃h en qiti, vitki ce yow-e yod maz̃her jeft
Kum wakht ki bondem yow yod, niwizdep z̃hũ tek̃ht dem dũnyo

Vitki ma’r tumer qiymat, ki la’l-e Badakhs̃honi chiz
Ghafch pũrũt ma’r yow-e ishq, chiz go’m ya almos et tilo

Vitki pũzũv z̃hũn pilpich,cartes̃h k̃hũ girya et nola
Dam g̃hẽtak haten’wm zirich, werc̃h’mes̃h har wakht c̃hez̃hm daro

Yow yod-e ma’r k̃hetk harom, yem z̃hũ khuz̃hg yinũk et z̃hũ orom
Diwonawores̃h g̃hirem, d’am-e khũshruy vul jo bajo

Dik̃ht et teyi trem z̃hũ yod, yow-e ya yusig̃h qisayisht
Nasti filhol gar chora, got’mep jald wuz woz yow rizo

Da k̃hũ gũl-e yodet nẽs̃hetk, Fazal Amin ce k̃hatet rũms̃hetk
Pishew woz wez ska vẽdek, wiz’tep ti s̃hik̃h k̃hat ti Porso

Composed on September 15, 2023 in Gilgit