Z̃hũ Khuz̃hg Lol: Yi Nazar Skẽ ghũlom Amin Beg-e Shakhsiyat

Cẽ Fazal Amin Beg en

Dẽ k̃hũ kaspi amonatdor, dẽ k̃hũ ilmi lup qalamkor
Dẽ k̃hũ aqli da kuhsore, dẽ rũwes̃hi gharib’v-e yor

Haldep gar shov woz kũs̃hũydep khalgev, magam haq-e qẽs’r owozi bũland
Rostig̃h-e ya qẽsavep dũrzd dẽ k̃hat, jay ne wũdrũken yavep gok̃ht tra yand

Zindagig̃hes̃h rimit ce darwishona, yig̃hun khalg’v-e pũrũti yow diwona
Yow-e niyũdh sẽk shet hamisha, magam kum’r be wost cartes̃h shilha

Yarz et yimũk-e jẽnaw weres̃htes̃h sarsavz yow Hamish
Nasty pũrwo tafig̃h et sũrig̃herki didig̃h yow arzish

Ajab sẽk vẽdek ya bogh-e maywa-e drakhti yow
K̃hũn to digar kũk̃hteri maywa dam-v-e dhasti yow

Ghũlom Amini shohin, bũlandi Hamish yow tapin
Wolch, qẽrgha et kirgas, woc’nes̃h ta’m parwoz ghelchin

Pes-e rang gherdep yig̃hun, cartep bikhlew yan ce s̃hẽkor
Hayronev boz et bũspũr, k ce mal g̃hat yow da jondor

Yibu g̃has̃h yow-e bobat chiz nivishni nast ma’r oson
Ki kẽs̃hen yem stowis̃hig̃h, cartep qũw maz̃h woz nodon

Wuch tu car Fazal Amin yem kalom k̃hũ lol-e bobat
Yow-e ki yem kes̃hen, cartep khuy yow woz dẽ k̃hat