Car’mes̃h S̃hũker Wuz Notawon

Cẽ Fazal Amin Beg en

 

Car’mes̃h shũker wuz notawon, ki tu’t z̃hũ ishq-e jahon

Woces̃h har wakht tu jawon, ne’s̃h cart kuy tag yem gũmon

 

Zib-e tani ce ti’n har wakht, nũwizdes̃h khũshruy ti rakht

Thaw’nes̃h sẽk tow paragon, ki nast kuy da pariston

 

Ya ti sũdoyi shirin, ca wakht’ni z̃hũ hamnashin

Dũres̃h fazd ce dem z̃hũ jon, wostes̃h z̃hũ ishqer darmon

 

Tiloyi rukhsori ti’n, khũshruy ya kirdori ti’n

Ra ti dhast kẽt̃etkem k̃hũ jon, vitkem ce tower qũrbon

 

Shohi tag̃hm da k̃hũ mẽjoz, raqs car skem z̃hũ ishq-e soz

Sadqa ta’r wuz owozkhon, z̃hũ khũshruy siyo chashmon

 

Win oshiq-e shoyiri, dem z̃hũ c̃hez̃hm et pishoni

K̃hetkem z̃aq chiz ta’r ayon, magam ghafch chizi dem pinhon

 

G̃hird tower ti Fazal Amin, ye khũshruy moh-e Parwin

Tu’t yow mẽrgech dem zamon, win yo dem ishq-e makon