CUMER Khũshbakhtem WUZ Wudhg

Cẽ Fazal Amin Beg en

 

Bu hazor et cẽbũri ce yem sol

Ya k̃hũ dũr-e wing haten wuzem bihol

 

Tu wist-e panz̃ Disambar, lup yem ror

Yow khũsh sado kũs̃hũyner wuz biqaror

 

Khũshbakhtem kẽs̃henem k̃hũ jon-e sõdo

Ki yow kũs̃hũyner car’mes̃h har wakhtes̃h du’o

 

Shambi-e ror vitu kũl, nag̃hd barobar

Tuwem dẽ ishq-e Chila, sũrig̃h sẽk sar

 

Kheli dhiren tu, k̃hetu’v yow cẽ ma’n zhet

Netu chiz chora ki z̃hũ puz̃uves̃h thet

 

Hadem naìd barobar tra z̃hũ yodes̃h dik̃ht

Khẽdhorg-e kholi wũrt-e rang z̃hũ maghzes̃h rik̃ht

 

Ghafch dhir en torem ce dik̃ht g̃hate da z̃hũ dũr

Yow khũsh sado’n z̃hũ pũzũv vite pũr nũr

 

Ceyi rek̃hk dhir niv ya z̃hũ gũl banafsha

Z̃hũ Pũzũv kerti jũmbes̃h dam-e qẽsa

 

Kertem ozmũd kartem ska’m gardan yi vũr

Cerenges̃h ko k̃hand dem wakht z̃hũ ishq-e ya hũr

 

Nikbakhtem ki yowe yem kert ce qabũl

Rizogig̃hi ce dhet, c̃hitep ya spo shũl

 

Ti skem tizig̃hem ce put̃, ye z̃hũ shohin

Har wakhtet ce bũland z̃hũ moh-e parwin

 

Ti stowis̃hig̃hes̃h g̃hirdes̃h har wakht trem z̃hũ dil

Wostes̃h rabob z̃hũ pũzũv, z̃hũ zik yow z̃il

 

Fazal Amin,   ti banafshayi ce gha khuz̃hjin

Sarbũland weres̃ht yow da banafshayin

 

 

Composed in Rawalpindi, December 25, 2004.