Dish K̃hũ Manz̃il Dem Safar

Cẽ Fazal Amin Beg en

Cẽ wakhtes̃h ki yi khalg res̃ht cem dũnyo en
Ajabes̃h caren khalgisht nola cem balo en

Okhir chi’res̃h ko wocen tumer dẽ nola
Nũwn et wac̃hnes̃h k̃he woc’nes̃h ce diwona

Khalg-e nẽs̃hakes̃h dishn marg dem jahon
Res̃htes̃h okhir kumer ko noyoft ya jon

Ki chav’nes̃h margeren sak, yi ney yi rẽwor
Chi’res̃h yan dũzen marg sak tumer ska k̃hũ tor

Tan parast’veri yem marg ce lup yi ozob
Jonparasteveri soz dem nay et rabob

Khok-e tanes̃h wiz’t k̃hũ wakhter tra yand
Chizer ki yem jon dem qolib vitu band

Jon ki ce wakht vitu qayd hadem zindon
K̃hetuyi nola et faryod da osmon

Haskem zamin khẽmak en dik̃hti ce nũwn
K̃hati ki yo Khũdhoy! Dremi gũno’v-e shũwn

Tatnan et khis̃hqom’v-e kert ce lup khũshig̃h
Vite spoken awlod niv bet chiz ghamig̃h

Vite pocen zẽman, g̃hate spo jonashin
Cẽ har karbola et qẽsa’v en Niyes̃hti’n

Perevte jon drem dẽ ghafch lup imtihon
Kaft et tag̃hde Hamish dem tan-e jahon

Ne werg̃hne tag yow khũsh dem shet-e k̃hũ tan
Kerti suma vẽdek ki got woz k̃hũ shan

Wakht ki g̃hate neyi perst tu’t dẽ kum hol
Wostes̃h jon niv dẽ khũshig̃h, tani avol

Z̃hũ manz̃ili hatra kum jay’nem ki wezg
Win ki niv cereng tapin woc’nerem gezg

Bu wakhtem tu dẽ tow ghayb-e khizina
Cerenget wozomd maz̃h yarker, k̃hat andisha

Tuwem ti dhast ce wuz ya lup amonat
K̃hat wudhg fik k̃hetket a ney dem khayonat

Dem jahon maz̃het vẽdet, win k̃hũ amol
Wudhg ti amol’vem vẽdetk,khũsh et malol

Kerti k̃hat e jẽdha k̃he niyes̃hte ya jon
Ye baf Khũdhoyor ta’r z̃hũ shet-e makon

Yem jone kert parwoz, tani ghelchijin
Jiraghas-e sadoyisht bland ce skem zamin

Jon-e poke k̃hat: khabardor! me nũwit
Wudgh z̃hũ safari da z̃hũ asl, me niv qũwit

Asl manz̃ili ko kumd dish ye inson
Me car z̃ereng qũwlẽway tu ye nodon

Ce wakhtev ki khamovd z̃hũ tan e ra gur
Cerenges̃h ghes̃h yow be dem safar da k̃hũ dur

Z̃hũ tan-e asl manz̃ili ki ra zamin
Wuzem tek ghafch bũland da arsh-e barin

G̃hati’v da k̃hũ jay okhir shet et rakhnig̃h
Tek̃h ki niyes̃hte hawoyi da zindaig̃h

Dem jahon ye Fazal Amin, yewer k̃hũ manz̃il
J̃akh yig̃hun hikmat-e ya soz ska k̃hũ z̃il