Dushambi Ror-e Qũw: Yi Rost Zhindag

Cẽ Fazal Amin Beg en

Ogast-e shadhi ce wudhg yem mũy bu hazor et yũw
Dem Dushambi-e ror vite ce ya qũw, z̃hũ jon woz be thũw
G̃hirovdet rukhn z̃hũ ishq-e jahon, zhrek̃htu ce da shũw

Z̃hũ yore wudhg rẽpak̃htu vẽdetk, wezde dem z̃hũ bar
Yow-e khũsh sado-e nasha kert maz̃h mast, per’vete tem z̃hũ sar
Wea z̃hũ rukhn kũpit ko Wũzũm, wudhg ya kũsh khabar

K̃hatem dẽ k̃hat en ki z̃hũmaki kum en ko g̃hẽtetk
Rahmi azor ko k̃hetk a k̃he yiloyi dẽ maz̃h g̃hẽtetk
Ye z̃hũ noyoft z̃hũmak Voynep ko kat̃a a skem z̃hũ vẽdek

Hay wuz avol k̃hetkem k̃hat tiwetk khũsh tra yi bũdyo
Wezgi tiwetk kum khalg-e qũwer dẽ k̃hat en hamro
Hay woy kum’res̃h bet yund maz̃h e yow, z̃ereng da k̃hũ dũnyo

K̃hatem k̃hater ki ye bichora! Me khiyol z̃i tes̃h
Me lecer z̃ereng tu k̃hat e tumer be ska’m-e hes̃h
Vitu’t a ney tu cam en ghafch dẽr wakhtken z̃i bes̃h

Kertem yi fikr dẽ k̃hat k̃he k̃hatem,nasty tag parwo
Bes̃h en tẽr bes̃hi ma’r wudhg yow sado-e tamano
S̃hũpakhovdi z̃hũ ruh cum sol en da k̃hũ khũsh sado

Armon’v-e z̃hũn en thũwni nast s̃heg̃h, yek̃hkem dem z̃hũ jon
Doghes̃h ki di tu yem z̃hũ pũzũv, wostes̃h ma’r darmon
Randes̃h ti Fazal Amin yem du’o, “hal khũsh et amon”