Got’mes̃h Ti Khuz̃hgig̃h

Cẽ Fazal Amin Beg en

Cumer be dhir ki rec̃h dem jahon, got’mes̃h ti khuz̃hgig̃h
Jeftet ce maz̃her tu dem z̃hũ jon, got’mes̃h ti khuz̃hgig̃h

Woces̃h mẽrgech maz̃her k̃he wezi’s̃h tu dẽ z̃hũ yinot
Ye ne gũtak mũzhdayig̃h-e kon, got’mes̃h ti khuz̃hgig̃h

Ccartes̃h ce voyn ti ishq-e Chirogh, rem tirich zindon
Car’mes̃h rem shũkr wuz notawon, got’mes̃h ti khuz̃hgig̃h

wũz’mes̃h yig̃hun ozmũd-e witish, mũshes̃h yan k̃hũ ruy
woc’mes̃h pilpich et wuches̃h boron, got’mes̃h ti khuz̃hgig̃h

Cartes̃h ti khũsh sirat et sũat ghal batk maz̃h kabob
pec̃h’mes̃h dem ishq-e ottash fashon, got’mes̃h ti khuz̃hgig̃h

jus̃hes̃h ce cart ti yod-e raknig̃h, wiz’tes̃h zilzla
g̃hirũvdes̃h ki holek z̃hũ makon, got’mes̃h ti khuz̃hgig̃h

k̃hetket k̃hater s̃hũrig̃h-e ya khun, Fazal Amin-e pũzũv
woces̃h dem mehr-e lup ya mizbon, got’mes̃h ti khuz̃hgig̃h