Khamde Ce Ya Z̃hũ Shohin

Cẽ Fazal Amin Beg en

 

Khamde ce ya z̃hũ shohin, wudhg skem z̃hũ ishq-e zamin

Larzdes̃h z̃hũ pũzũv ajab, dam-e shon yem k̃hat tayin

 

Tuwem wuz dar intizor, coghd’rep g̃hat ko ya z̃hũ yor

Wezgi dem ishq-e diyor, gũl’v-e ya z̃hũ gũl e win

 

Cher’mdep skem z̃hũ c̃hez̃hm-e bar, nasti hojat ya’r digar

Haldep dem pũzũv-e khun, dishtep yow k̃hat k̃hũ tirin

 

S̃hũpkhetki ce yow ajab, ne’p wocem tag bi-adab

Wudghi yow lup z̃hũ mihmon,   khamem yower skẽ birin

 

Wũrkhetki z̃hũ gũl-e vul, vitkem skem ce mast et gul

Sarbũland woz be yow wost, k̃hetkem dam vul k̃hat girin

 

Lec’rem yow-e khũshruy dhast, skem k̃hũ pũzũv-e c̃hez̃hm-e sar

G̃hatem da k̃hũ ishq-e voyn, wezgi ce ya z̃hũ shirin

 

Majnũn’ni ki Fazal Amin,yow Layliyi ce khuz̃hgjin

Ska bũlandig̃hi yow stor, khũshruy yow moh-e Parwin