Khirad Khũdhoye Ki Ta’r Dhetk, Shũkrev Bajo Ko Wũzũm

Cẽ Fazal Amin Beg en

Khirad Khũdhoye ki ta’r dhetk, shũkrev bajo ko wũzũm
Haywon’v en ki towi yũretk, zikrev c̃hũto ko wũzũm

Rẽ pũzũv nepervetki ce, ya voyn et jon -e wũyũk̃h
Ya Aqli cereng chũvetk, fikrev pũr baho ko wũzũm

Yash-e jẽnawi ti nafs, ti khiradi skem ce swor
Vidinet ki yem dishetk, aqler yow razo ko wũzũm

Ti nafsi sẽk tow siwor, wũdũr tu k̃hũ aql-e jilaw
Trẽ destet nafs ki diyet, aql e k̃hũn safo ko wũzũm

Saroyi ce yem jahon, teyet drem bu rẽwor-e mehmon
Da Sohibet ki g̃hẽtek, mekrev k̃hũn rẽwo ko wũzum

Dem dũnyowet tu sũvdogar, ti tarozũwi ti imon
Hachig̃h’vet ki k̃hũn nũsetk, adl-e ya sũvdo ko wũzũm

K̃hũ sũkrot car Fazal Amin, rec̃hneret yi ror rem zamin
Ilm-e maywavet ki wũzmetk, yav dẽ sado ko wũzũm