Wudhg e Ror Tu Wez

Ye spo Mawlo spo Shohi Shohon wudhg e ror tu wez
Ye kifch jahon e Joni jahon wudhg e ror tu wez
K̃Hũ narz en sake car ko tu pũr wudhg e ror tu wez

Cẽ ton tẽrvich yem dũnyowi yan saker chiz bẽkor
Ti voyn e dest wẽrec̃hnen sak’ri hawli drem bẽhor
Wez k̃he disũv ko saker k̃hũ nũr wudhg e ror tu wez

Dũnyo wezayni gar ki saker dishnen c̃hak k̃hat k̃hak
Dishnen bagher yem dũnyowi yan zindon e kũfak
Dishn e dem ku nik̃hind sak ska tũr wudgh e ror tu wez

Kũk̃htres̃h ki diyũv c̃hak k̃hak e mur, woc’nes̃h yasht sirob
Yem s̃hiz̃hg e qoq e jayishtev drem yupker ghafch bitob
Ya mur nig̃hevũv nik̃hind ya rũr, wudhg e ror tu wez

T̃ũmt̃angig̃hes̃h ki werkht dem jahon woc’nes̃h yan bẽrbod
Ti voyn e wing et tov e dẽstan car’nes̃h yan faryod
K̃Hũ voyn et toven c̃hak sak yi qũr, wudhg e ror tu wez

Ghafch baf yicũv’ne sar’net Tu k̃hat, kuk̃ht’ri yem misol
Da ti k̃hẽnak e wũyũk̃her g̃hẽtak, woc’nes̃h kũk̃ht s̃hiyol
Sẽk k̃hũ k̃hẽnakev wũzũm sak jũr, wudhg e ror tu wez

Fazal Amini wokhwidh dem ti bar, ghurung dẽ vũr ren drem
Nès̃h kercert ki k̃hat wuch ko z̃i cart, cem yishũr en drem
Yem vũr’ve camen wuch a z̃hũ dũr, wudhg e ror tu wez

Cẽ Fazal Amin Beg en