Ye Zhũ Khuz̃hg Ishq-e Nobot

Cẽ Fazal Amin Beg en

Ye z̃hũ khuz̃hg ishq-e nobot, wez’is̃h ce tu dem z̃hũ yinot
Ya ti khũshruy sũrate k̃hetk k̃hater khun ce dem z̃hũ zot

Ki nas̃hes̃h ghafch wakht ye jon, woc’mes̃h ti haten ce parishon
Pilpich wost z̃hũ pũzũv, to yow ti khũsh sũrates̃h got

Kum’ret nes̃hetk ko ye tu, z̃hũ khũshruy z̃hũmak-e bidg̃hanz̃
Yiloy ko k̃hat tu wez k̃he kũs̃hũy yem z̃hũ ishq-e munojot

Vitkem ce wũdh dem ti ishq, woc’nes̃h avoljin ki didig̃h
Wez k̃he ozmũd ko tu k̃hat, har palew en yem z̃hũ holot

Zhirek̃hkem trẽ qilagig̃hem, okhir dem ti ishq-e safar
Mebodo dik̃hkt kuy maz̃h e suq, wudhg yan rẽ kum fisq yoy ofot

K̃hũ dhast e rand ma’r yiloy, nik̃hind maz̃h e k̃hat tu tra yand
Me lecer k̃hater chiz ghelch, Hamish dẽstan dem kharabot

Towes̃h ki yodem z̃hũ hũr, woc’mes̃h ce wuz ghafch pũzũvhet̃
Kum batkem ki wuz zinda, nivshem Hamish ya ti sifot

Pev’mes̃h ti ishq-e sharob, got’mes̃h har wakht s̃heg̃hd zindagig̃h
G̃hat’mes̃h ce da lup jahon, nas̃htes̃h z̃hũ kũl mũshkilot

Dẽ khuz̃hgig̃h rek̃hki mẽ dest, ti Fazal Amin ce zabardest
Tapines̃h wost ska nitheng, har wakht yow da ti ishq-e s̃hot