Yi Fikr : Koynot et Inson-e Dishn

Cẽ Fazal Amin Beg en

Yem koyinotet paydo ce k̃hetk ye z̃hũ khuz̃hg Khũdhoy
Inson-e aqli yem e dishner, ghal cẽbas et bipoy

Dẽ sayns et t̃eknoloji rek̃hki pũrũt wudghg-e inson
Sitor’v et kahkashon’v-e dishneri khirad ghal gũdoy

Sayora’ver ostoni yir ki g̃hirenes̃h yasht yower har ror
Spo sayorayi zamin, yem dishneren ghal langipoy

Ghafch zib mes̃hi ce z̃hũmak, woz spo ya hamsoya Marikh
Yaven bafter ne dishetk, dẽ k̃hũ dawo z̃ereng me osoy

Insoni k̃hat yi koynot, ki didig̃h k̃hũ sar en pũdher
Ce sokhti tan pẽ liman, kum’ri jon, yem fikr ko yiloy

Dimoghi k̃hat lup jahon, khetk nungi dono’v e hayron
Bipecev ce dẽ k̃hũ dishn, insoni ghal dem nomijoy

Dẽ k̃hat k̃hũ panjtan e dish, ska’mves̃h ce c̃hit ti zindagig̃h
Dimogh, Pũzũv, s̃hus̃h et welk, ko woz k̃hũ jigar e dẽ k̃hat joy

Go k̃hũ pũzũv e oynek k̃he awal tu k̃hat e da win
Winep yan da kahkashon, ne’p werec̃h kumer tu nojoy

Dem Koyinot k̃hũ safar dishnen me kat̃ tag cẽbas
C̃haw pũrũt Fazal Amin, wocep dem donoyig̃h en boy