Dem Z̃hũ Pũzũv-e Da Bahor, G̃hate ce Ya Zhũ Ishq-e Boz

Cẽ Fazal Amin Beg en

Dem z̃hũ pũzũv-e da bahor, g̃hate ce ya z̃hũ ishq-e boz
Kerti sẽk c̃hez̃hm et ya s̃hẽkor, yuti maz̃h da khũ jahon woz

Ki nasti yig̃hun yow parwo, teyi ce mast da k̃hũ dũnyo
Shũker magam ki z̃hũ hũshyor, vitki ce z̃hũ ishq-e hamroz

Ki nas̃htes̃h dem ishq ya z̃hũ yor, wu’s̃h be k̃hanem ye baf bor
Dik̃htes̃h yan yow maz̃her dichor, bikhlew da z̃hũ yinot-e soz

Dẽ ishqes̃h ki khalg kumer be res̃ht, yow-e ya maywo’s̃h Hamish pes̃ht
Sharti ki dishn ya k̃hũ dildor, boghbonig̃h-e hũner et roz

Ki wostes̃h kum Nag̃hd wũs̃hikjin, g̃hates̃h ce k̃hat nag̃hd-e mawjin
Voynes̃h kart ma’r z̃hũ wafodor, vitki ajab z̃hũ nang et noz

G̃hẽtetkem ska’m yod-e yishũr, ghes̃htes̃h ce ma’r ya z̃hũ khuz̃hg hũr
Wezgev ce khũshruy de kanor, Pũzũv-e c̃hez̃hmisht dem biyoz

Cartes̃h tirin ska’m Fazal amin, ska k̃hũ bahodũr k̃hũ shohin
Res̃ht bũland Hamish yow-e sitor, khũshbakhtig̃h weres̃ht ta’m-e poz