Gham et Khũshig̃h

Cẽ Fazal Amin Beg en
Junjuni yorev dẽ liman en qiti, gham et khũshig̃h
Jeftev har kifch dẽ har kuy, dẽ har so’at dẽ zindagig̃h

didig̃h s̃hukurg ko yiloy, dẽ k̃hat woz da khun et da kuhbar
gotep har jay ya kis̃hta, kumer khũshigh kumer nokhũshig̃h

Cumer nozũki et tonũki pũv, demi nast hchiz shek
Dish ko pũzũv-e holev tu sẽk ruy et c̃hez̃hm-e oynek

Pũzũv-e khũshig̃h ki k̃han, car ko k̃hũ baf fikrev yakjo
Cẽ k̃hũ imon en gũmon’v woz wũzũm k̃hũ aql-e bajo

Kuy be ki wezd demm jahon,neyes̃h wind hamish rohatig̃h
Kap’nes̃h ce yasht be k̃hũ quz, magam sũdhũynes̃h dẽ khũshig̃h

Kuy be ki wezde dem jahon, marg-e shartes̃h wost da’n ayon
Magam ki mirtes̃h kuy khalg, chiz’res̃h wocen sak yan nodon

Fazal Amin! yek̃hk woc mẽ dest, rec̃h tu da qonũn-e Qudrat
Gham et khũshig̃hi dẽ fẽrmet , car andisha ko tu dẽ k̃hat