Haq-e Yi Tamosho: Inson-e Dũrũn et Rẽwes̃h-e Yi Taswir

Cẽ Fazal Amin Beg en

Cumer be dokht ki k̃hat car, nokht be k̃hat car, chizi foyda
Ya ror wẽzayner bũng’rev tow e ra shet ye diwona

Yiloy ko car andisha, tu dẽ k̃hat k̃he k̃han kum’net wezg
K̃hetket k̃hat ce mastona, dem jahon vitket abota

Bu rẽwor ce s̃hitikũvdes̃h yem wakht k̃he tow e g̃hirũvdep shet
Go woz be fan flũkig̃h woz mastig̃h-e tu k̃hũ tũkma

Rẽmetket ce k̃hũ imon k̃he khũg ranget kẽt̃etk k̃hat lew
Woz be tu woc darinda, yoy ya kirgas et s̃hend qẽrgha

Shaches̃h ce lik̃ht yem ti g̃has̃h, het̃et k̃hat k̃hetk kũl dem jahon
Ghafch jaldep perv ra qũbgha, wocep k̃hatken tu sharminda

Mastig̃h et khũdsarig̃hep wũdũrt tow e jald dem ti jon
Silsũn-e rang yark’v-e nasha, dik̃htep jald tow e pẽ kẽnda

Me dish k̃hat e tag chiz zur, kũk̃ht-e sar’ni ya zurowar
Dam-e astam-e pũrũt, kuy tu hũmuỹ ye bichora

Har qism-e g̃hudhig̃h en k̃hetket k̃hat c̃hak k̃he cares̃h tirin
Disũves̃h k̃hat ce niknom, munofiq’v-e ya sarmoya

Sletket takabũrig̃h, bẽghetig̃h et hachig̃h-e vag̃hd
Chirengev ce da ti tẽna, k̃hetkev ajab tow tẽrghiya

Coghd’rep di tak k̃hũ nafs et hirs-e molev tu da khũ ghel
Sarhet̃ ya molisht ce het̃ yaw’nes̃h har imon-e savza

Bu rẽwor-e dem zindagig̃h, dish insoniyat ye Fazal Amin
C̃haw et didig̃h tu dẽ k̃hat, go pukhta insof-e qelha