Mihnatkash Mazdũrem

Cẽ Fazal Amin Beg en

Mihnatkash mazdũrem, insof mes̃h bũspũrem
Yũrt-e ya dastũrem, wũrt et dhes̃hnpũrem

Mezd et dũr yi jeft tayin, cem’v en mezdũr lafzepwin
Dũr-e tag̃hm’ves̃h kũrem, yow-e mezd’ves̃h c̃hũrem

Dish yem bu lafz “mezd et dũrz”, cereng ki qitiyev yarz et fũrz
Yarz rang savz da sũrem, fũrz ranges̃h k̃hat rũrem

Araq-e daryo’m dem jahon, wẽk̃henes̃h poc̃h’vem dem k̃hũ jon
Ska mũshqaitig̃h’v-e tũrem, rohatig̃h’ver dũrem

Hũmũyd bahor yoy khizon, tobiston yoy zemiston
Dhastpũdh kẽt̃aki majbũrem, merz jon’ver ya bũrem

Mihnati ki dẽ nik’v-e adab, bihishti nast tag chiz ajab
ghilmon et ya hũrem, da k̃hũ mezd’v-e nũrem

zur kum yark wost yoy oson, mazdũrem wuz tey dra ayon
Rost yark’ver wuz jũrem, dẽ har kerd nojũrem

Wez’mes̃h de s̃hũrig̃h-e jahon, cereng be hũmũyd ya inson
Pũzũvhet̃’ver s̃hũrem, bẽghet’ver bis̃hũrem

Fazal Amin! Nũwz’mes̃h tra yand, trẽ har mushkil sarbũland
Mezd’ve-e toj-e vũrem, khũshruy kẽz̃hek-e pũrem