Wudhg-e Pidhing Dũnyo: Inson-e Dũrũn-e Dest Yi Rost Qolibi dem Kalom Tre Vich

Cẽ Fazal Amin Beg en

Wudhg-e yem khalgev didig̃h k̃he k̃han chizi drem ko wing
Liman’rev nast rẽying k̃he ce dũnyoyi drem pidhing

Dishnes̃h k̃hat dono haryũw dremer vitkev podsho
Dono woc’ner ko chizi rẽwo nastev ta pẽrwo

Vitkev insiz k̃hũ nafs spũnger g̃hirnes̃h trem ha-ror
Hachig̃hen yave c̃hez̃hmishtev nag̃hd vitkev biqaror

Bẽghetig̃h et jẽghetig̃h en pidhsũvetkev yem dũnyo
Ghazhdig̃hen kũli jahonev nũsetk, dishnes̃h k̃hat sũwo

Pũrũt rek̃hkin pũdh wũdrũk k̃he cẽbas khẽs̃haki ghafch
Woc’nes̃h pũzũvjep hawli ki limanes̃h caren pakhch

Ce k̃hũ ghimirsig̃hen wũzmetkev kũk̃hter noc̃hũtkig̃h
Kis̃hkis̃hi kũl jahon niv dremer nasty os̃htig̃h

Dẽ fanflũk bẽghetig̃h et yem z̃huq rẽdhoren c̃haw
Kumbatkep rũnd̃ũy z̃eng ey nodon, shakep tu z̃i thaw

Tinjig̃h rẽwes̃hes̃h ne gotten, dẽ shak khalg e fẽrmet
K̃Hũ shũm tilika pẽrũt kẽt̃aker c̃haw’nes̃h brin bret

Pitriz̃h’n et kerig̃h-e vẽdeki niyes̃h pũrũt inson
Z̃eng yerz̃h’nishtev jobiren, jobirisht skam’v hayron

Trẽ khalg e pũdh e destes̃h ki mirt bikhater yi prich
Wostes̃h sũwo cemen parishon, wostes̃h kũl pilpich

Cum’r wog̃hes̃h randen bigũnoyisht wudh hadem jahon
KHũniv-e dhast s̃hẽkores̃h wocen nũwizdes̃h yav-e jon

Sẽk rost vẽdek yicũv’neri ko teyi ya kuy mahkam
Z̃i bigũnowes̃h khalgev c̃hũpen, sarves̃h car’n qẽlam

Inson woc’n e dawo ko me car ki shayes̃h tu khalg
Cẽ shak jobir’ven shaket tu k̃hat harwakht to’ri marg

Digar khalgev e shov k̃haker yan car’nes̃h c̃hak banay
K̃Hudhoy-e nung ẽfset ki ceng yo dũrzenes̃h harjay

Kum yark’ver ki neyi tey, sũkrot woc’nes̃h hada
Kes̃hpec woc’nen cẽbas yan tayin pẽrvetkev ra qũbgha

Zangorev k̃hetk pũzũvev k̃hũnen, dawo’s̃h caren lup
Ya s̃hũw s̃hkorch e ranges̃h thawen, dũrũni yaven sup

Ũs̃htũr e rang cẽ ghest et ghand en, pũzũvev k̃hetk k̃hũn c̃hak
Ta sar khũmũvn-e jay yan tayin, car’nes̃h ce’ng k̃hat pak

Rẽ khalg e ruy nakhchir e sokht k̃hũ mekr en shaytijin
Trẽ khalg cẽbas ya fuks-e rang yav dini ghelchijin

S̃hkurgens̃h ki got’n a ozor s̃hũrin and̃wol
K̃hũ zindagig̃h dẽ yus en remin me wocen avol

Ghafch zurig̃hes̃h wizit ki got en k̃hater baf hamro
Tayines̃h caren ki dam’vi tey yi ne yi blo

Giz Fazal Amin tu chalg ko du’o z̃ereng me osoy
Cem pidhing dũnyo’n nik̃hind sak tray and, ye spo khuz̃hg KHũdhoy