Ye Z̃hũ Gũl Chiz Ta’r k̃hanem?

Cẽ Fazal Amin Beg en

Ye z̃hũ gũl-e nozanin, chiz t’ar k̃hanem
Ye z̃hũ jon-e shirin, chiz t’ar k̃hanem
Ne’s̃h wezin ya khũshruy lavzisht skem z̃hũ zik
Ya khũshruy’v-e hasin, chiz t’ar k̃hanem

Z̃hũ nag̃hd-e tinjig̃het tu
Z̃hũ ror-e khũshig̃het tu
Z̃hũ dardver dorgig̃het tu
Z̃hũ khuz̃hgig̃h-e khuz̃hgig̃het tu
Z̃hũ khus̃hig̃h-e khus̃hig̃het tu
Z̃hu biqarorig̃h-e qarorig̃het tu
Z̃hũ jon-e jonig̃het tu
Ye z̃hũ gũl-e nozanin, chiz t’ar k̃hanem
Ye z̃hũ jon-e shirin, chiz t’ar k̃hanem

Z̃hũ pũzũv-e glecig̃het tu
Z̃hũ ishq-e oshiqig̃het u
Z̃hũ kalom’v-e shoyirig̃het tu
Z̃hũ weskig̃h-e yupikig̃het tu
Z̃hũ merzig̃h-e k̃hechig̃het u
Z̃hũ mũshkil’v-e osonig̃het tu
Z̃hũ tirichig̃h-e rukhnighet tu
Ye z̃hũ gũl-e nozanin, chiz t’ar k̃hanem
Ye z̃hũ jon-e shirin, chiz t’ar k̃hanem

Z̃hũ ishq-e obruyig̃het tu
Z̃hũ oshiqig̃h-e bũlandig̃het tu
Z̃hũ khiyol’v-e khũshruyig̃het tu
Z̃hũ talkig̃h-e khuz̃hgig̃het u
Kuli khũshruy’v-e khũshruyig̃het tu
Kũli qobil’v-e qoblig̃het tu
Z̃hũ ishq-e s̃hast -e s̃hastig̃het tu
Fazal Amin-e voynig̃het tu
Ye z̃hũ gũl-e nozanin, chiz t’ar k̃hanem
Ye z̃hũ jon-e shirin, chiz t’ar k̃hanem