Yi Ruboyi

Cẽ Fazal Amin Beg en

Khũdowando! Z̃hũ Yem dhast tu tem hdast zor me go
Jigar pe jigar et digar tagida khor me go
Har jayev khũg et nakhchir s̃hapt et fuks, woz s̃hend et qẽrgha
Dem jingal bilũm‘v e, pẽ jobirev s̃hẽkor me go

Sũy-e jẽnaw sũdhũyes̃h tiz k̃he cares̃h ro t̃ũk
Ki woces̃h tu khẽbar, ti c̃hez̃hmisht ghal tẽr yinũk
G̃hires̃h noghurdum-e rang, woces̃h haral ra k̃hũ s̃hũy
Chiz bchora niv bet ki niyes̃hki ti dhast en wakht-e ya mũk

Halens̃h shirin viz̃hikisht, ce ska har yi kuh-e sar
Pũr gus̃htetev skẽ gũl banafsha woz ska gũl-e ambar
Mast et trẽ hawo’v ce yasht, skẽ pokiza yupk et hawo
C̃haw’nes̃h ce ku’en tẽr kuh, halenes̃h cẽ liman-e khabar

ki reg̃hdit tu dẽ kum s̃har, ya s̃har-e bozorev dish
ki g̃hatit de diyor, diyor-e korborev dish
Ki k̃hanes̃h k̃hater inson, car andisha tu skem jahon
Me rũmũs̃h! Inaasoniyat -e ya maghz et shohkorev dish

Skẽ kamzurev k̃hũ dhast wuch k̃hak, dishnes̃h k̃hater dhayig̃h
Trẽ zurev-e dest wẽzak, dishnesh k̃hater lupig̃h
Kũli munofiqat en c̃haki wudhg-e yem jahon
Insonev skẽ liman kẽt̃ak, dishnes̃h k̃hater k̃hũ tizig̃h

Cumer be ki bas tu wez, yund pũrut k̃hũ beghetig̃
Me kat̃ k̃hat e tag cẽbas, thũw k̃hat e dem rakhnig̃h
Dẽ hachig̃h nũwiz pũrũt, me tag kuy pẽ tow nũwizd
G̃hatep dẽ asl bihisht, ki ddẽ fan flũkig̃h et takabũrig̃h

G̃hudhig̃h car tumer tu ki, woc sarm mẽ dhock’v-e tat
Kahalgev shũtor-e haten, kũli jahon ko tu g̃hat
zinhor me hal tag cẽbas, dẽ lik et khalgev chiremn
gotep hawli yan jay, har jay dem munofiqiston

Gar rrost qisa’v-e k̃haki jũrm et gũno dem watan
Magam zinhor! Me go tag, fan k̃hater k̃hũ zib et shan
Fazal Amin, tag tu me dũrz, fan dihũvn-e kum vẽdek
bũwni kũli gũno’v-e nan, woz har jũrmev-e zẽman