Dem Ishq-e Otashkadah, Thit et Teyi ce Yem Z̃hũ Jon

Cẽ Fazal Amin Beg en

Dem ishq-e otashkadah, thit et teyi ce yem z̃hũ jon
Ko k̃hand z̃hũ gũl banafsha, ki yow oshiq be yi inson

Ki bũndes̃h yow ya k̃hũ fil, dũrzdes̃h yan lup jay de’m z̃hũ dil
Dam ishqem vitk wuz wayron, thaw’mes̃h ce dem pidhing jahon

Sivandem tu da nag̃hdin, bikhlew g̃hate z̃hũ moh-e Parvin
Thetki sẽk maz̃h yow-e pũzũv, k̃hetki z̃hũ nang ce nogũmon

Dam-e charkh viti’n tapin, neyen werg̃hene sak skem zamin
Yuti ce woz maz̃h s̃hiyol, oshiqon’v-e da pariston

Z̃akhm z̃hũ puũzũvi marham, da k̃hũ khuz̃hg tabibig̃h-e dam
Dheti ma’r ishq-e dũs̃htov, kerti woz z̃hũ dard-e darmon

Gũl banafsha da k̃hũ dhast, kerti yiloy woz maz̃h ce mast
Ska k̃hũ khuz̃hg barg’v-e vul, kerti toza woz yem z̃hũ jon

Fazal Amin vitket woz wir, pẽrvetki ti gũl ce gha dhir
Ynot-e rang yow yig̃hun, vozhũvdes̃h ti ishq-e makon

Composed on September 23, 2023 in Gilgit