Z̃hũ Ishq-e Mũshk et Gũlob, Z̃hũ Raqs-e Noyoft Robob

Cẽ Fazal Amin Beg en

Z̃hũ ishq-e mũshk et gũlob, z̃hũ raqs-e noyoft robob
Rakhnig̃het kẽt̃etk tem z̃hũ jon, ska’s̃h yem thit et wostes̃h kabob

Chiz’ret k̃hetk maz̃h e haz̃i zhet, k̃he diyetket maz̃h hatem shet
Bas har ror marg dem jahon,wez k̃he gur car maz̃h dem azob

Vẽdek’vet kũl ce rẽseng, k̃he k̃hetket k̃hat kũl z̃i nẽkes̃heng
Yem k̃hũ oshiq da biyobon, likerket bik̃hech et bi-ob

Ne chiz salom et paygom, bandet k̃hetk ce ya k̃hũ kalom
Wocep ghafch jald tu tolon, g̃hatep yan woz dem z̃hũ rikob

Pec̃h’m et teyem da ti yod, k̃hũ K̃hũdhoy’res̃h carem faryod
Me per’v dẽ zur imtihon, c̃haw tu dem z̃hũ ishq-e shabob

Het̃ k̃hũ pũzũv woz yiloy, ye z̃hũ khuz̃hg go yow lup et boy
Yund woz k̃hũ oshiq mehmon, pevit woz k̃hũ ishq-e sharob

K̃hũ Fazal Amin go k̃hũ nang, bas ko car niv dam en k̃hũ jang
Dem ti ishq vitki pahlawon, ne’t dishetk ghal tow k̃hũ uqob

Composed on September 17, 2023 in Gilgit