Category: All

Cẽ Fazal Amin Beg en

Ki wezgi har jay bahor, chiz’ri yan diyetk maz̃her khizon
Car’mes̃h k̃hũ gũler gila, k̃hetki zhet maz̃h dem gũliston

Tuwem ce mast dam-e vul, ne tu tag chiz gham dem dũnyo
Mũshetki k̃hũ khũsh sũrat, sar mẽ chiriri niv yem z̃hũ jon

Nigah car har bũlo en ya z̃hũ gũl e, ye z̃hũ Khũdhoy
Me kat yow tag da tũfon, woz me dẽ kum lup imtihon

Nasti bis̃hũr z̃hũ porso, har wakhtem gũtek yow wafo
Bodũr z̃hũ ishq-e bũspũr, nasti kuy yow rang dem jahon

Pitkem yow-e ishq-e sharob, vitkem niv dam-e yod ce kabob
Chiz go’m wuz yem k̃hũ chut̃ jon, ki nasti dẽ ma’n z̃hũ jonon

K̃hũ wakht-e Majnũnem wuz, woz har wakht-e farhodem be wuz
Vitki noyoft z̃hũ Leyli, ya z̃hũ Shirin ma’r drem giron

Fazal Amin! wizitep ya ror, nas̃htep jald ya shũm ozob
G̃hagtep ti Porso dẽ tow, randep woz ti darder darmon

Cẽ Fazal Amin Beg en

Ror cẽ ror en wostes̃h kũt̃, biwafo yem dũnyo maz̃her
Vitkem dam-e ishq wuz ce fano, nasti parwo porso maz̃her

Yow yod-e piriches̃h yit, yem z̃hũ dil jigar cedẽ dẽ k̃hat
K̃hetki bũrbod z̃hũ dũnyo, ghal be yow tamano maz̃her

S̃hẽkendes̃h z̃hũ khuz̃hg pũzũv, okhir da k̃hũ z̃ũlmgarig̃h
Nasti tumer z̃hũ khato, rand’s̃h dem ũmr en sazo maz̃her

Rizhũng ya dũndũk-e rang, tuz̃hũvdes̃h ce yow maz̃h hamish
Ne’sh gotem yow-e wafo, ki rand darder dawo maz̃her

Vitki yow-e yod ma’r wũs̃hũk, shũm ya yi az̃hdar-e jẽnaw
Ne’m k̃hetk dem ishq ishtibo, chiri yan yem ror siyo maz̃her

Kẽt̃etki maz̃h da k̃hũ chang, k̃he k̃hetki k̃hat yowe ce malang
Ajabi z̃hũ dilrubo,wũzmetki ce jafo maz̃her

Fazal Amin chiret mẽrenj, k̃hũ pũzũv en k̃hũ gũl e s̃henj
Kũs̃hũy z̃hũ dard ye porso, g̃hatũv yiloy shafo maz̃her

Cẽ Fazal Amin Beg en
Ishqi yi diwonagig̃h, res̃htes̃h tra charzh-e ruyig̃h
Ne’s̃h tayin cart chiz khatar, rewezdes̃h da mulungig̃h

Khuz̃hgig̃h-e da intiho, cartes̃h oshiq k̃hat fano
Kartes̃h k̃hat yem da zarar, ki g̃hat yow da bũlandig̃h

Hũmũyd s̃hot yoy ya tũfon, yinag̃hn et sil da maydon
Ishqi hamish pũzũvwar, cartes̃h raqs da k̃hũ mastig̃h

Ne’s̃h weres̃ht oshiq ya s̃hung, ishq-e da rakhnig̃h-e mulung
Thũwdes̃h k̃hat yow sar to sar,ki got yow k̃hũ oshiqig̃h

Haldes̃h mast yow da k̃hũ gũl, wostes̃h yemzel yiran kũl
Shekhs’nes̃h nag̃hd et ya sahar, oshiqi dam bandagig̃h

Z̃hũ khuz̃hg ishqi z̃hũ porso, yutki maz̃h da k̃hũ dũnyo
Ceyem dam yod-e safar, randes̃h yow ma’r ya khũshig̃h

Fazal Amin! da k̃hũ sanam, g̃hatũves̃h ce k̃hũ ishq-e dam
Gotes̃h k̃hater khũsh khabar, dam-e negũtak-e khuz̃hgig̃h

Cẽ Fazal Amin Beg en

Ya z̃hũ porso vit woz sẽk maz̃h ce mihrbon
Wozomdi khũshig̃h dem z̃hũ gham-e jahon

Westu bik̃hlew ska z̃hũ gũl-e ruy witish
Nostem yan yow-e ya khuz̃hg ruy da osmon

Perviti’m dẽ gham-e dũnyo ki cereng go’m
Ne vit maz̃her chiz chora, ne’m got darmon

Shũker tower z̃hũ Mawlo kẽs̃henet faryod
Kertet ob z̃hũ gũl-e pũzũv dem z̃hũ jon

Ya z̃hũ gũles̃h cart ozmũd maz̃h sẽk har ruy
Dũrzdes̃h cẽ maz̃h en yow ishq-e imtihon

K̃handes̃h ki k̃hatem winem niv yow-e ishq
Cumer k̃hũ pũzũvnves̃h cart yod k̃hũ jonon

Fazal Amin! vitki ti porso ta’r mẽrgech
Nũstes̃h ti ghamev ce da k̃hũ pariston

Cẽ Fazal Amin Beg en

Ki ne kert kuy tag wafo, da ti ishq-e khũshruy safar
Ozmũd tu woz be yow ko, ki g̃hirdes̃h tra s̃hũrig̃h yow far

Didig̃hiki ssẽk khalg yi farz, ki dũrzdes̃h yow ishq-e ya qarz
Lecer tu yow dam dũnyo, ki dishtes̃h k̃hat yow chiz digar

Kuyes̃h Hki disht ishq-e shon, yow’ri zẽvetk yem khuz̃hg maydon
Sangdil’ri yem norawo, ki dik̃ht tem bar yow k̃hũ shũm sar

Sokht en cum be yow sokhtin, rizmes̃h ki dam-e pũzũv win
Lecer yow tu’t ki dono, gew yower ya k̃hũ ishq-e bar

Har kuyes̃h c̃hit da k̃hũ jeft, ishqes̃h be awal yemzel tek̃ht
Ki pidhistes̃h yem da hawo,yanes̃h wost hawli pũrasar

Ska yi pũdh woc’nes̃h ki lang, ska yi ruy ishqes̃h c̃hit da jang
Me rec̃h tumer da sazo, ki ne’s̃h g̃hat da ishq-e maz’har

Fazal Amin! tu’t ya khũshwakht, ki gũtetket k̃hũ ishq-e bakht
Tu’t da k̃hũ ishq-e Porso, ki dhetki ta’r yem khũsh hũnar

Cẽ Fazal Amin Beg en

G̃hirovdem k̃hũ sarer, k̃hũ ishq-e jawoni
Gotem k̃hater hawli, ya k̃hũ ishq-e pari

Takabũr et bihis khalges̃h wost darinda
Dam-e pũzũv kumer, ya ishq-e bashari

Sũdhũy’neri gar yi bis̃hũr khalg be inson
Kum’ri chirir-e gũl, kum’ri gũl-e sũri

Dẽ kuy ki insoniyat, da’n khuz̃hgig̃h-toqat
Yemi lup ni’amat, dish dẽ k̃hũ zindagi

Qad en ki da choqig̃h, sokht en dẽ khũshruyig̃h
Nasti tag yem zomin, ki c̃hit da oshiqi

Ki wũdhi da hachig̃h, thites̃h da bẽghetig̃h
Dẽ dawlat ki masti, yowi ishq en kholi

Shũker ki gũtetket, k̃hũ ishq-e ya s̃hũrig̃h
Ta’r Fazal Amin wezgi, ce ghafch lup khũshbakhti

Cẽ Fazal Amin Beg en

Kẽs̃henem wudhg kumer ya ti khuz̃hg sado
Ti khũsh gũftorig̃h et khũshruy ti ado

K̃hatem ki chi’r ne nivishem woz yi bu band
Wũzmem ti khũsh sifat dem lafzev daryo

Tummer rawoni mes̃h ya ti khuz̃hg qisa
Fẽzdetket dũr ce dem z̃hũ ishq-e dũnyo

Werec̃h obod hamish dem z̃hũ khuz̃hg kis̃hta
Niga cart Khũdhoy tow ma’r ye z̃hũ porso

me cart kuy tow e c̃hez̃hm ye z̃hũ jonon
dũshman’v-e nazar thit, yemi z̃hũ du’o

g̃hates̃h dem z̃hũ dimogh ti har khuz̃hg khiyol
larzũvdes̃h z̃hũ pũzũv ti e khũshruy sado

wũzũm k̃hũ gũl-e khuz̃hgig̃h woz be pũrũt
Fazal Amin, me lecer tag dam en k̃hũ wafo