Kẽs̃henem Sahar Sahar K̃hũ Jon, K̃hũ Khuz̃hg Bũlbũl -e Khũsh Sado

Cẽ Fazal Amin Beg en

Kẽs̃henem sahar sahar k̃hũ jon, k̃hũ khuz̃hg bũlbũl -e khũsh sado
Ne tu tag yem da z̃hũ gũmon, car’mes̃h shũker ta’r yo Mawlo

Yi gham-e mahfil en cẽbas, zhrek̃htum ce dẽyi qafas
Gotem sẽk tor ya k̃hũ jonon, kert rũs̃han z̃hũ tirich dũnyo

Werc̃hem yower Hamish sadqa, ceyi dẽ ma’n yi g̃has̃h qisa
Tu’n kifchtan dẽ lup imtihon, nostem woz jald ya k̃hũ khũnz̃o

Bahadũri ce ya z̃hũ dũr, k̃hũshruy z̃hũ bihisht-e ya hũr
Z̃hũ c̃hez̃hm et pũzũv-e armon, jald ko g̃hat z̃hũ gironbaho

Ghafch dhir en vitk tapin k̃he gezg, dem gharib watani ce wezg
Vite mol’v en c̃hak woz z̃hũ makon, ishq-e ya toj skem z̃hũ kũlo

Ye z̃hũ jon-e ya khũsh bahor, z̃hũ ishq-e ya rũs̃han sitor
Da ti yodem ghal mast jawon, ne’s̃h rũms̃hem tag ti khuz̃hg ado

Z̃hũ khuz̃hg en khuz̃hg moh-e parvin, g̃hird Hamish ta’r ti Fazal Amin
Tu’t k̃hat z̃hũn k̃hũn dẽ har jahon, z̃hũ negũtak-e ya hamro

Composed on Sunday, November 12, 2023 in Gilgit