Love / Romantic

Ishq-e Rakhnig̃he Da Borbor, Pidhsovd Dũrũn Z̃hũn Yi Ror

September 16, 2019

Cẽ Fazal Amin Beg en

Ishq-e rakhnig̃he da borbor, pidhsovd dũrũn z̃hũn yi ror
Kerti kabob z̃hũ jigar, skem z̃hũ pũzũv vite siwor

Dem khuz̃hgig̃h-e khũsh dũnyo, shirini yow khuz̃hg sado
Oshiqig̃h-e kifch howo,dines̃h liman ce kanor

Wostes̃h banafshah ce gul, da gũl ambar -e khuz̃hg vul
Ishq-e dem maydun niv cul, hal dam kanor dem bahor

Bũlbũl en khuz̃higi yow awog̃h, boz en qiymati ce yow wog̃h
Sher-e rang wostes̃h pidhog̃h,car’nes̃h sak k̃hũ ishq s̃hẽkor

Ne’en k̃hetk sak k̃hũ ishq ayon, ne’s̃h dam g̃hat kuy dem jahon
Car’nes̃h sak yow ce bayon, ska k̃hũ oshiqig̃h-e tor

Thaw’nes̃h da ishq-e jahon, ki wost kũl ya spo armon
Vitki drem yũw ya spo jon,ska spo khuz̃hgig̃h -e sitor

Fazal Amin Cartes̃h du’o,wocen sarbũland dem dũnyo
Ishq-e Podsho et Khũnz̃o, wocen sak ye z̃hũ khuz̃hg yor

You Might Also Like

No Comments

Leave a Reply