Wakhi

Z̃aqlay Za’v-e Baydisht (Kids Rhymes in Wakhi)

April 1, 2021

Gim et Gũm
Cẽ Surush Ayman Beg en

Gim et Gũmev z̃aqlay k̃hũy
Windev yave ce bu sũy

Sũy’ves̃h kert dẽ liman en logh
Hhaq mẽlaqev kert ya bogh

Gũme k̃hat ki ye Gimjon
Sak be rec̃hen da maydon

Sũy’v-e rang caren s̃hitik
Din sak put, woc’n pit̃ik

S̃hitikev kert et viti’v khũsh
Ca’n cẽbas viti’v mũshmũsh

Lup Dawlatisht
Cẽ Surush Ayman Beg en

C̃hez̃hmisht tinen ce khũshruy
Win’mes̃h dem k̃hat ce buybuy

Mis ko k̃hũn tu dish z̃hũ jon
Dames̃h khas̃h skem dem jahon

Shulut̃ et palch rang yem ti g̃his̃h
Kũs̃hũy tu skem, me woc kis̃hkis̃h

G̃has̃h ko kk̃hũn tu het̃ yiloy
Win dũndũk et zik dem boy

Zikes̃h dũrzd ce har maza
Furus̃hisht g̃has̃h-e darwoza

Dhastes̃h mũrst et cartes̃h cap
Dũrzdes̃h k̃hech et cartes̃h lap


Pupik et Mumik
Cẽ Surush Ayman Beg en

Pupik et Mumiki kuy
K̃hũy et vũrũtev yasht buy

Rek̃hkev tẽr yark yav tatnan
Wũrek̃hkev sivand yav zẽman

Diyetkev k̃hew ra k̃hũ gora
Vitkev ce kifch bichora

Yitim rang vitkev nochor
Ne vitk dam’v-e hes̃h hadem ror

Pẽrvetk kifch za dẽ khatar
Thetki tatnan-e jigar

Dez̃hgev k̃hũ zẽmanev pẽ poz
Yutkev yav ra khun-e goz

Dhetkev yaver zharzh et qand
Vitkev khũsh yav jigarband

Wẽrkhetk Sitorisht da osmon
Cẽ Surush Ayman Beg en

Wẽrkhetk storisht da osmon
Cerengev rũs̃han nogũmon

Kuy ko k̃hetk sav e paydo
Ne’s̃h dishem yemi cereng ko

Past ko kham yoy yund maz̃h bland
Khũshruy sitor ko ma’r tu kand

Tirich nag̃hder voynev sa’sht
Pilpicher osoynev sa’sht

Kum’rev dẽ ghulev kumer jũdha
Haryũwev sasht dẽ shilha

Ye z̃hũ Yir, ye z̃hũ sitor
Cerengi ti voyn et tov z̃hũ yor

Fik’res̃h carm wuz inson
Bi-istin kutet osmon

Bigjon Et G̃huz
Cẽ Surush Ayman Beg en

Bigjon gezde sahar sahar
Dez̃hdi k̃hũ shiven tẽpar

Pemg’ni k̃hũ kafs̃h ta k̃hũ padh
Vasti k̃hũ miyun tẽr madh

Karti yowe k̃hat niv sẽk vẽdek
Dik̃hti tẽr k̃hũ c̃hez̃hm oynek

Sũrig̃h en yow dhast pẽ kal
G̃hate Bigjon da jingal

Gok̃hti okhir k̃hater g̃huz
Garchi ror tu kheli suz

Wozomd g̃huz da k̃hũ bari dũm
Viti’v hayron kũli mũrdũm

Dik̃htev rakhnig̃h pac’tev k̃hech
Viti’v ce khũsh voch et bech

Yem Z̃hũ Zamin
Cẽ Surush Ayman Beg en
Yem z̃hũ zamin, z̃hũ sayora
Seldes̃h boy et bichora

Yemi spo nan, sak yow zẽman

No Comments

Leave a Reply