Ziki Tey Aql-e Safir

Cẽ Fazal Amin Beg en

Ziki tey aql-e safir, ajabes̃h wost yow-e taswir
Kum’res̃h wost khuz̃hgig̃h-e pir, kumer pidhisk et toshgir,
Ko woc shur et shar en dhir, ki dez̃hget aql-e jogir

Zikes̃h hald aqler mizbon, woz hamish yower darbon
Aql-e jay ziki ki mehmon, gok̃htes̃h har kuy pashaymon
Ko z̃aq ya k̃hũ zike gir, go pũrũt k̃hũ aqle mir

Ziki aql-e tarozũw, wozi khiyol’v-e chorbũw
Kumm’res̃h g̃hũrt khalg dẽ k̃hũ qũw, kum’res̃h kart khalg’v-e s̃hũw
Ko dish k̃hũ baf zik-e dir, me kat̃ k̃hũ baf aqle dhir

Aqli sẽk zik ce mehrbon, ki lec’rtes̃h zik k̃hũ nis̃hon
Wostes̃h aql yan yow posbon, pũshũwdes̃h ya k̃hũ nodon
K̃handes̃h ya’r ye z̃hũ faqir! koshki me rũnd̃ũy z̃er’ng wir

Ki niyes̃hte yis̃hal en zik, neyes̃h rand bara et shik
Kum’res̃h dik̃ht rakhnig̃h et sik, kum’res̃h kart yupk hayemm zik
Go k̃hũ baf fikrev khamir, dhũs yav car da aql-e shir

Misl-e yi jon et yi tan, aql et zikev tẽr liman
Cẽ jon en zindayi ki tan, cẽ aql en zike ko k̃han
Me kat̃ sẽk har kifch ya tir, magam dish aqle ya sir

Nastev cẽ liman en jidha, kum batk inson ki zinda
Aql et zik-e ya bara, wostes̃h ayon dẽ marka
Go k̃hũ baf fikrev mashir, wostep aql yan ti wazir

Woc siwor k̃hũ zik-e yash, magam wũd’r aql-e jilaw
Neyep cart hechkuy tow mash, masto mast pukhta yan c̃haw
Ki viti’t aql en kobir, ne’p wũdũrt tow ya chirir

Odam-e aql ki murshid, zikes̃h wost aql-e murid
Pẽ gap ki vite murid, ne’s̃h wost wayronig̃h padid
Ki fares̃h g̃hirũvd taqdir, chi’res̃h yan aqle bigir

Zikes̃h hald dẽ g̃has̃h-e bar, aql-e s̃hig̃huni ska sar,
Fazal Amin yewer barobar, dish bafter kifch-e hũnar
G̃hat okhir da aql-e yir, go sarsavz qũz zik-e qir