Ziki Ce Lup Niyamat

Cẽ Fazal Amin Beg en

Ziki ce lup niyamat, nasl-e Odam dem paywand
Demet ce dhetk barakat, shũker Tower Khũdhowand

Hadem farhang’ve olam, zik’ve voynisht ce pidhing
Misli sitor lim et lam, wẽrkhetkev to dẽ har yand

Chũvetket ki dem chaman, yem-e niga k̃hak be dish
Bũland yund yem nashiman, mũrdũmep k̃hatken dra sand

Bis̃hast diqunev tayin, thũwetkev fasl et darakht
Vitk yave bakht pora pora, nũsetkev bara et qand

Tẽrwachker qomvev winetk, woris-e qomev ne vitk
K̃Hũ pẽryen’vev ki g̃hir‘vetk, k̃hatev nẽs̃hetk hara band

Misli meywa-e darakht, farhangi ti’n dem buston
Dhir me k̃hat khas̃h ey boghbon, k̃hũ hũnar’v-e ko drem rand

Aql-e izhori ki zik, ilm-e ma’yori be zik
KHiyolv-e tori ki zik, chi‘res̃h yan k̃hũ zik-e vand

K̃Hũ tat-e khũn didig̃h, k̃hũ nan-e zharzh-e halol
Yav-e zik me car pimol, ki ney shak wocep sivand

Dẽ k̃hũ farhang et zabon, khiradmand woc ey posbon
Yem’ve qadr dish dem jahon, Fazal Amines̃h hayem k̃hand