Biyomorz Hakim Zafarulloh Beg-e Shakhsiyat et Khidmat-e Khalq

Mũborak Ta’r Yem Safar, Sad Mũborak Ta’r Yem Safar

Cẽ Fazal Amin Beg en

Ye z̃hũ spreg̃hi ambar, wost mũborak t’ar yem safar
Lekertet sake bisar, reg̃hdit k̃hat tu Khũdhoy-e bar

Ti chũvak vit dẽ Kũnjudh-e nungi tabib-v-e khondon
Pũs̃ht dar pũs̃ht kertev darmon, g̃hat dẽ tow yem ilm et hũnar

Mũtket vit tu dem hikmat ki g̃hatit tu da k̃hũ yoshig̃h
Kas nokas’ver ti tabigig̃hes̃h okhir kert ce asar

Hũmũyd tirichig̃h-e dawr yoy hũmũyd yem dawr-e zamon
Misl-e Hakim Luqmon, viti’t kũl jay tu ce nomuwar

Ti khun et gũli Gũlmit, vite shafokhona dem watan
Shafoyobev vit har tan, hũmũyd inson yoy ya jonwar

S̃har ba s̃hari baf haspitol, yashch-e baf tabibisht arzon
Ki resn ũmid-e darmon, vitit tu ũmid-e sahar

Vitiv bipũdhisht pudhin, madhen c̃hoku’sht woz ce madhin
Gok̃htet bidhast’ev dhastin, yashchev s̃hastin woz bor owar ,

Shekheste cũbũr wist-e shadh bahorisht dẽ ti zindagig̃h
Bilũm nochorver dorgig̃h, kertet tru-wist sol en sẽk sar

Bu-wist hazoren sẽk sar khalgvet jũr ce kert dem jahon
Razokor yark z̃eng garon, tow yem kert z̃hũ kuh-e ambar

Mehmondorig̃h-e rẽwes̃h, tu qiti dem ti tabibig̃h
Car’nes̃h har kuy mindorig̃h, yeme ti rec̃hnen cebas ta’r

Hadem ti khidmat-e khalq vit ti zodbũdisht be hamkor
Ti hamsar vit ti dhastyor, de ti tabibig̃h et khun bar

Neyi niyetk ya ti voyn, balki pidhingi dem jahon
Mu’izjoni k̃hũ pup-e kon, dhetket ya’r k̃hũ ilm et hũnar

Tuwet tu nungi yi tojir, k̃hũ watan en to da Pomir
Misl-e Kũnjũdh-e safir, tag̃hdit Pomir ce zarowar

Dẽ k̃hũ farhang et torikh,woz riwoyat et khis̃hqomig̃h
Tu dẽgretk ti zindagig̃h, dishtetes̃h yemev ce barobar

Ki khamdit s̃hitik-e maydon, tu dra ayonn ti bodũrig̃h
Dẽ jugun woz darobi vitites̃h boz et sheri nar

Dẽ yũrtigorig̃h et vẽrũtig̃h, woz diyordorig̃h-e astam
Dhetet khũ fikrẽv-e nam, woz astamgarig̃h-e jowhar

Vẽndetu’t k̃hũ zindagig̃h, towe ce dẽ k̃hũ bandagig̃h
Ya ti Khudhoparastig̃h, viti’s̃h ce qiribi casar

Ce hayronjinet tiwetk, ki yewerdet k̃hũ rec̃hn-e wakht
Nasti dẽ har kuy-e bakht, dishn k̃hũ so’at z̃er’ng barobar

Reg̃hdit sẽk zik et sẽk pũdh, car’nes̃h shũkr woz ghelch ey yor
Koshki me wiz’t z̃er’ng dichor, trẽ vẽdek ta’r ya shũm az̃hdar ,

Ti okhri pẽs vẽdek wakht vit hazorho pẽzũvisht dargil
Remtev ce yas̃hk’v-e sil, hũmũyn k̃hũnen yoy ya digar

Khũshruy yem khũ har kis̃hta, ye z̃hũ qibla draw da jahon
Nasib ta’r bogh-e buston, woz pariston-e har samar

Likerket saker misol, k̃hũ baf yark et k̃hũ baf kirdor
Woc’nep sak cem’ven sarshor, neyep rũms̃hen tow spo rahbar

Fazal Aminer ti khidmat, lavz’ver wũzũmn nasty oson
Kumres̃h g̃hatem ta osmon, ma’r ijozat bor z̃hũ shikar