Mũborak Ta’r Ti Chũvak-e Ror (Happy Birthday To You)

Cẽ Fazal Amin Beg en

Hadem jahon et dem diyor, khũshbakhtig̃h-e ya sitor
Wost nasib ta’r z̃hũ khuz̃hg yor, mũborak ta’r chũvak-e ror

Ya sarbũlandig̃h dẽ har wakht, dũrzd k̃hater jay da ti bakht
Sarsavz bahor wost ta’r dichor, mũborak ta’r chũvak-e ror

Kat̃ nik yarkev-e tag̃hm et c̃haw, amn et khũshig̃h-e faslev draw
Woc ilm et hikmat-e paristor, mũborak ta’r chũvak-e ror

Ya pariston-e zhũ khuz̃hg pari, gũliston-e z̃hũ gũl miri
Ye z̃hũ ishq-e rũs̃han sitor, mũborak ta’r chũvak-e ror

S̃hkend k̃hũ takabũrig̃h-e sar, bẽghetig̃h et hachig̃h-e bar
Da k̃hũ imon woc tu teydor, mũborak ta’r chũvak-e ror

Ya bihisig̃h di tu pẽr pũdh, ra zidig̃h-e z̃huy me woc wũdh
Niyoz wuz ta’r z̃hũ wafodor, mũborak ta’r chũvak-e ror

Ti Fazal Amin’ni ta’r du’o, cẽ haq en woc tu ya Porso
dẽ insonyat woc tu nungdor, mũborak ta’r chũvak-e ror