Noyoft Z̃hũ Kuh-e Ambar: Jon et Tan woz Zamon et Makon

Cẽ Fazal Amin Beg en

Noyoft z̃hũ kuh-e ambar, kum’res̃h gotem tow z̃hũ jigar
Mũborak ta’r yem safar, reg̃hit wudhg tu Khũdhoy-e bar

Kũs̃hũy’t sufi bũzũrgev, k̃han’mes̃h bu g̃has̃h yav-e hikmat
Car pok fikr et amal k̃hat, yanep tu g̃hat da, k̃hũ parwar

Ki wiztes̃h za dem jahon, woc’nes̃h khũsk̃h khis̃hqom et khondon
Magam ya tilf dẽ giryon, ki perevte yow dem mahshar

Ajabi yem ko didig̃h, ki lecertes̃h khalg yem jahon
Woc’nes̃h kũtan dẽ giryon, yowes̃h ghes̃ht et res̃h dem safar

Har kuy ki wostes̃h yow dhir, k̃hũ wũyũk̃hen dẽ har jahon
Weres̃htes̃h yow sargadon, s̃hukurgdes̃h woz k̃hũ asl-e bar

Tages̃h ne wost khũsh yemm jon, dem jahon dem tan-e zindon
Kum’res̃h hald kup da biyobon, yow halaki ra samandar

K̃hetk bindi spo zindagig̃h , yem zamon-e dem k̃hũ makon
S̃htiũvdes̃h sak dem jahon, pish-e pũrk rang, ye z̃hũ dilbar

Khalg-e rec̃hn wakhtes̃h ki wizt, kum’res̃h bet ya so’at k̃hat mũsht
Hamishi siwor sẽk spo pũsht, kartes̃h bikhliew ce ya khingar

Hũmũy’n tabib et habib, yoy hũmũy’n ya mir et faqir
Mawt-e pũrũtev dhastgir, rec̃’hnes̃h kholi dhast dem safar

Dem jahon ti baf kis̃hta, wostep tũs̃ha ta’r da jahon
Sarbũland da parriston, cherm k̃he got tu har samar

Ti har baf yark dem dũnyo, wostep har yũwer baf misol
Ti nik amolisht ti mol, yundep bũland tow Dam-e bar

Wost nasib ta’r kũs̃hodh jay, da jahon de arsh-e barin
Salom ta’r ye spo shohin, k̃hũ maydon-e toj et johar

Fazal Amin, dish dem jahon, zindagig̃hi bu ror-e mehmon
Wudhgi ki rek̃hk ti jonon, kartep pig̃ha tow-e trẽ safar