Devotional

Z̃hũ Muhammad Mustafo

May 23, 2018
DEVOTIONAL WAKHI POETRY

Z̃hũ Muhammad Mustafo
Cẽ Fazal Amin Beg en

K̃hatet ilm-e Shahinsho, z̃hũ Muhammad Mustafo
Tu’t hikmat-e ya Podshow, z̃hũ Muhammad Mustafo

K̃hatet Khũdhoy-e ya Nũr, kũl jahoni da ti hũzũr
Tu’t Odam-e bo safow, z̃hũ Muhammad Mustafo

Ulil azm paghambaret, insoniyat-e rahbaret
Tu’t kũli aql-e baqow, z̃hũ Muhammad Mustafo

Osmon’v en bũlandi ti shon, nast chiz lavz kuy cart bayon
Tu’t cẽ kũk̃ht en lup Porsow, z̃hũ Muhammad Mustafo

To Odam misl-e kokab, ol-e Imroni ti nasab
Ajab ti shoni bolo, z̃hũ Muhammad Mustafo

Ti sifat cartes̃h Khũdhoy, woz har farishta har loy
Salom sẽk tow z̃hũ Mawlo, z̃hũ Muhammad Mustafo

Din-e Islom-e istin, vervesovdet skem zamin
C̃hawodet ce k̃hũ asso, z̃hũ Muhammad Mustafo

Islom-e qolibet k̃hat, Qũr’on-e sohibet k̃hat
Tu’t imon-e asl wafo, z̃hũ Muhammad Mustafo

Lup sirati t’in dem jahon, sannades̃h rand da Qũr’on
Bimisolet dem dunyo, z̃hũ Muhammad Mustafo

Tirichig̃her rukhnig̃het tu, ghamig̃h’ver ya khũshig̃het tu
Tu’t jahon-e lup ya dono, z̃hũ Muhammad Mustafo

Viti’t Bikas’ver kasdor, woz yatim’ver chorador
Biwog̃h’ver viti’t sado, z̃hũ Muhammad Mustafo

Parhizgorig̃het gok̃ht toj, nostet ranget nasl-e ya riwoj
Dardmand’ver tu’t ya shafo, z̃hũ Muhammad Mustafo

Yutet bẽland k̃hũynan’v-e shon, rẽ shet’n’net yav wuch da osmon
S̃hẽketet bũt’v et bũto, z̃hũ Muhammad Mustafo

Khũshruy ti rẽwes̃hi bimisol, dẽ za’v en za dẽ har hol
Har yũw tu da ti sano, z̃hũ Muhammad Mustafo

Bakhs̃his̃h k̃hak gok̃htet riwoj, hayronet gok̃ht kũl samoj
Misolet lekert yakto, z̃hũ Muhammad Mustafo

Imondorig̃h dẽ niyat, tu bũnyodh da ti sirat
Rostguyig̃h tu ti doro, z̃hũ Muhammad Mustafo

Sak’ret dhetk k̃hũ pok itrat, adl et insof k̃hũ sunat
Qũr’on-e poki ti gawo, z̃hũ Muhammad Mustafo

Kũk̃ht en lup rozdonet tu k̃hat, dẽ har wijdonet tu k̃hat
Aql et ishq-e ya Sakho, z̃hũ Muhammad Mustafo

Bashar dusti-e imon, tu da ti amal dem jahon
Khuzhgig̃h et Haq-e razo, z̃hũ Muhammad Mustafo

Kam ilmi drem Fazal Amin, ne’s̃h bas wiz’t stowis̃h-e ti’n
Bakhs̃his̃h ma’r car z̃hũ Oqo, z̃hũ Muhammad Mustafo

You Might Also Like

No Comments

Leave a Reply