Khũsh Khabar dẽ Khũsh Safar

Cẽ Fazal Amin Beg en

Dẽ khũshig̃h en woc’mes̃h tapin tẽr hawo, ki wiz’tes̃h ma’r ya khũsh bahor

G̃hat’mes̃h wuz ska bũlandig̃h woc’nes̃h hamro, boz et bũspũr ma’r ce harr ror

Rec̃h’nes̃h z̃hũ rorisht sũbũk, woc’mes̃h khũshkhuy, ki hal’mes̃h da bihisht-e bogh
Werkhũv’nes̃h spreg̃hisht k̃hũ vul maz̃her khũsruy, dines̃h dẽ k̃hat maz̃he ce dogh

C̃hites̃h z̃hũ zindagig̃h ghafch dẽ osoyish, ki pervimes̃h da pariston
Cumer shirin zabonev, nasti chiz kirish, noyoftev ce z̃hũ paragon

Wiz’tes̃h z̃hũ jon dẽ z̃hũ tan woc’mes̃h zinda , ki g̃hat’mes̃h da banafshayin
Petk̃hũvdes̃h ska k̃hũ vul maz̃h gũl banafsha, woc’mes̃h toza da k̃hũ shirin

Pes̃htes̃h hawli z̃hũ armon, ki’m da osmon, da sitor’v en ce’ev darakhshon
Pidhing et carmes̃h voyn yan da kahkashon, wirdistes̃h ce yem z̃hũ jahon

Nũwizdes̃h dẽ zhẽgat̃nen khalg-e dhast en, kup- jẽnaw amish yem wakht
Wũdũr k̃hũ kup’ve da wakht ta k̃hũ s̃hast en, wocept khũshbakht, gotep k̃hũ takht

Yinot-e ranges̃h khalg yund dem k̃hũ qisa, Fazal Amin bu bandet ce k̃hat
S̃hukurg aql-e khazina’t ishq-e moya, g̃hat da suz et soz-e hikmat