Noyofti Z̃hũ Zemiston

Cẽ Fazal Amin Beg en

Lecernes̃h yasht sak zinda, yupk et hawo woz rakhnig̃h
Ki nastev dem spo tẽna,me gũmon tu zindagig̃h

G̃hirdes̃h far ce har so’at,k̃handes̃h ki fiker car har wakht
Tobiston et zemiston, didig̃h garmig̃h et sũrig̃h

Stow’nes̃h gar ya khũsh bahor, woz ya zel khũsh tobiston
Ye nodon dish ya khizon, woz zemiston-e boyig̃h

Bofta ya zem ki ne dik̃ht, rũmũs̃h ya yaz, kũk et ya s̃hot
Kum’rep got yupk-e ya ganj, dami ce spo zindaig̃h

Nani har yi zemiston, seldes̃h har fasl dem jahon
Win bahor et tobiston, woz khizon-e da’n khuz̃hgig̃h

Bahor et tobistoner, randes̃h tirmo ya mũz̃hda
Hal bigham tu hamisha, g̃hũrt sarmoya dem sũrig̃h

Kham’nes̃h zem-e zharzh et mirik , har jay dẽ har kuhiston
Setkes̃h wost har yi kuhbar,har jondori dẽ yusig̃h

Noyofti z̃hũ zemiston, dẽ har dawr dẽ har zamon
Ya ki ne vit dem jahon, har fasli yan dẽ margig̃h

Har yi fasli wakht-e nung, zemiston-e bakhti ghurung
Da Yir’ni yow khas̃h pẽr khas̃hi , ru ba rui dam-e tovig̃h

Nũs johilig̃h-e witish, qonũn-e Qudrat ko dish
Dẽ har fasli khũshruyig̃h,winep damev ya khubig̃h

Khomi’v-e nik̃hingi oson, ki s̃hukur dẽ zemiston
Khubi’v-e gũtaki zur, gotep yav dam-e zurig̃h

Zem-e zemiston-e shan, truved faslev-e ya nan
Haldes̃h har wakht dẽ chũstig̃h, neyes̃h nas̃ht da k̃hũ nanig̃h

Nani ki ya zemiston, yow-e qadr dish dem jahon
dam soyayi obodig̃h, gotes̃h har fasl rohatig̃h

stow yow yoy me stow, zemistoni har wakht skẽ two
me car tu tag noshũkrig̃h,Fazal Amin car mindorig̃h

Composed on January 30, 2021 in Gilgit