Ne’s̃h Wost Tag Rũms̃hũvetk Ti Khuz̃hg Yod, Ye Z̃hũ Gũl Ambar

Cẽ Fazal Amin Beg en

Ne’s̃h wost tag rũms̃hũvetki ti khuz̃hg yod, ye z̃hũ gũl ambar
Woc’mes̃h dem yig̃hun ce gha bũrbod, ye z̃hũ gũl ambar

Hũmũtu khũsh bahor yoy zemiston, tirmo’t tobiston
Vitkem ce ti har yod-e siyod, ye z̃hũ gũl ambar

Netkem ce dem k̃hũ ishq-e da bogh, ya ti zot-e tag̃hm
Ti har rũwes̃h k̃hetk dem maz̃h ustodh, ye z̃hũ gũl ambar

Pũy’m et teyem ti ishq-e kichet, wuz dẽ har zamon
Ya khuz̃hg meywayisht nẽg̃hafk wudhg kũs̃hodh, ye z̃hũ gũl ambar

Rem k̃hũ pũzũv-e wund’rem ce kes̃hk, ya ti ishq-e fasl
Z̃hũ diqunig̃h en vitki ce obod, ye z̃hũ gũl ambar

C̃hawen Hamish qiti dem safar, tag me wocen jidha
Pukta wocen sak misl-e pulod, ye z̃hũ gũl ambar

Vitket ce tu dem ishq-e doston, Fazal Amin-e Shirin
Ko jald niv g̃hat tu da k̃hũ Farhod, ye z̃hũ gũl ambar

Composed on September 24, 2023 in Gilgit