Spreg̃h-e ra’no (A Wakhi Lament on the Deceased Wedding Party Members of Van Accident on August 22, 2012 at Hussaini, Hunza Valley)

Cẽ Fazal Amin Beg en

Ye z̃hũ spreg̃hi ra’no, ce nogũmonen sav nost
Dũnyo vit saver kũto, dẽ tobistonen sav nost

Khũsh tobiston dẽr nola, save nowakht ajal en
Gham-e soat’ri gila, ce dẽ giryonen sav nost

Ghelchev khas̃ht khálg’ve, ne tu jũr so’ati tuy
Ya khũshig̃h g̃hirde z̃iruy, ce sargardonen sav nost

Tapinev vit tẽr hawo, boz et shohin-e jẽnaw
Hacem shet dest en bũlo, ce tẽr osmonen sav nost

K̃Han’nes̃h tu z̃ereng yem marg, albat nivishetk KHũdhoy en
Ney, yem vit zũlm gũdoy’ven, ce notawonen sav nost

Vitkev gar sasht ozod, ca k̃hũ jon-e qafas en
Kũs̃hũy’t yem suz dẽ faryod, demk̃hũkhondonen sav nost

Zẽmanver nas̃hte shafqat ki yav nũsetk k̃hũkhuz̃hg tat
Tatnanver wezd qiyomat, dem k̃hũ zindonen sav nost

Zodbũd’ve nost k̃hũ hamsar, thete k̃hũyvrũt’ve jigar
Vitkev dustyorisht bipar, dem k̃hu makonen sav nost

Tuwev k̃hũ diyor-e moya, k̃hũ idorav-e sardor
K̃Hũ wataner madadgor, ce ghafch gironen sav nost

Chũvaki marg-e dẽstan, hechkuyi nast dem inkor
Ghelchijin marg dẽr qẽtor, biposbonen sav nost

Avoljin vit sav nẽs̃hak, spo zindagig̃h dar thẽwak
Ne dorũwdarmon gũtak, ce bidarmonen sav nost

Odamisht vite giryon, ozores̃h wocita bachat
Jobirver chiz yem towon, ki dem tũfonen sav nost

Weztes̃h da z̃hũ yinot k̃he, woc’mes̃h wuz ca’n be pilpich
Z̃hũ dũnyo ca’n be tirich, ki dem korwonen sav nost

Nastev wudhg dem jahon, sav baf yarkishtev payom
G̃hat-a saver spo salom, ce bi-armonen sav nost

Ceyev zavovd sav marka, vite drem lup yi darbor
Neyev wintu z̃e’ng ror, dem Kuhistonen sav nost

Nikbakht sav ruhisht tiwetk, saver Mawlo rat du’o
K̃Hũ paristonev g̃hẽtetk, gar dem jahonen sav nost

Fazal Amin!dish yem dũnyo, yemi mũsofiriston
Margi nast drmer pinhon, magam arzonen sav nost

Yod weres̃ht: Dẽ z̃hũ yinotes̃h har rẽwor cumer mũy batk en z̃hũ qisa dẽ z̃hũ biyomorz recopc vũrũt Bakhtulloh Beg mes̃h qisa werg̃hne. Woz hayem zel dẽ z̃hũ recopc vũrũt’v biyomorz Oqil Shoh et biyomorz Nosir Iqbol mes̃h ska’m-ve plẽnakes̃h woz cem jahon enrec̃hn-e bobat kheli qisa’s̃h vite. Yi nag̃ghdem kũli platk biyomorz vũrũt’v en e boqoyida musoyiba (interview) kert. Hayem lusi skẽ kũli biyomorz vũt’vev kumd’v-e nungishtev hayem zel yav-e ũmr-re hisbober: biyomorz Nosiruddin, biyomorz Dod Ali, biyomorz Oqil Shoh, biyomorz Nosir Iqbol, biyomorz Muhamad Wasi, biyomorz Bakhtulloh Beg, biyomorz Shokat Aziz, biyomorz Irfon, biyomorz Mujohid Qurbon woz biyomorz Shohidin.